Kliknete ovde za da gi procitate novostite

СИСТЕМ ИНЖЕНЕР НА ДЕВЕТГОДИШНА ВОЗРАСТ


Деветгодишниот Марко Чаласан од Скопје е далеку од дете кое само добро се снаоѓа со компјутери. Уште на шест години тој го положи првиот испит на „Мајкрософт“ за администратор на системи, а минатиот месец стана најверојатно најмлад овластен администратор со диплома на компјутерскиот систем на „Мајкрософт“.

Тоа значи дека ова дете, кого го нарекуваат компјутерски Моцарт веќе сега може да се вработи во одржување на сложени професионални компјутерски мрежи, иако е само четврто одделение во основно училиште во Скопје.
- Морам да кажам дека од техничка гледна точка, Марко е вундеркинд, вели генералниот директор на „Мајкрософт Словенија“ Матеј Потокар, кој неодамна имаше можност да го запознае во Љубљана, каде Марко за тамошниот тим на „Мајкрософт“ приреди получасовна презентација на системот на „Мајкрософт“ за уредување на директориум „Актив дајректори“ и сите предности и предизвици кој програмата ги нуди.

Марко го затекнуваме во Словенија каде преговара со една друга словенечка компанија која сака да го поддржи неговиот актуелен проект, а се работи за еден вид бесплатна едукација на луѓе ширум светот, која би се одвивала по пат на Интернет. Марко таму се наоѓа со својата мајка Радица, која ја презема улогата на ПР менаџер на младиот компјутерски гение.

- Уште на неполни три години Марко знаел да чита и пишува. Прво научил латиница, потоа кирилица, а уште додека бил бебе ги знаел сите автомобилски марки и не само марките, туку и моделите. На почетокот прво сакал да се занимави со астрономија, а бидејќи за тоа немал услови, кога наполнил четири години неговиот татко предложил да се занимава со компјутери, а Марко се согласил, вели за „Блиц“ мајката на Марко, Радица Чаласан.

Марко за „Блиц“ вели дека и натаму сака да се занимава со компјутерска наука и да креира некој нов оперативен систем. - Иако сите мислат дека не се тргнувам од мониторот, јас пред компјутер дневно поминувам околу четири часа. Признавам, некогаш тоа може да се продолжи на десет и повеќе часа, но не секој ден!

Македонската Влада имаше разбирање за малиот гениј, па така од Владата доби 15 компјутери кои лично му ги врачи премиерот Никола Груевски.
Марко ја доби и својата прва работа, како систем администратор, моментно ја одржува мрежата на една непрофитабилна организација за помош на хендикепирани лица, а во сопствената компјутерска просторија држи часови по основна работа на компјутер, за деца меѓу 8 и 11 години. За да може сето ова да го постигне, Министерството за образование го ослободи од редовна настава која ја посетува само неколку пати неделно.

- Често се случува додека моите другари спијат, јас да седам во канцеларијата и да работам, вели Марко.

Иако има големо знаење од информатика, напоменува дека компјутерските игри не го интересираат. Сака да игра со своите другари, наоѓа време да плива, вози ролерки и велосипед, а тренира и тајландски бокс.

Марко моментно работи и на проект кој треба да овозможи испраќање на телевизиски сигнал со висока дефиниција преку релативно слаба мрежна инфраструктура, а македонската телекомуникациска компанија му помогна со тоа што му обезбеди директен пристап до својата мрежа. Марко планира оваа нова технологија да ја демонстрира на овогодишниот саем на технолошки достигнувања ЦеБИТ во Америка во едно училиште за талентирани деца, а такви деца во Македонија за жал нема.
_____________________________________________________________________________
СЕГА Е ВИСТИНСКИ МОМЕНТ ЗА ВОНЗЕМЈАНИ?!

Британските астрономи веруваат дека шансите за пронаоѓање живот на другите планети се подобри од било кога порано.



Лорд Реес, претседател на Кралското здружение на астрономите изјави дека вакво откритие би го сменило човештвото и би му дало поинаков тек на нашето живеење, објави BBC.

- Би се сменило целото мислење за нашето место во вселената, како и погледот врз нас самите, вели Реес.

Со своите последни коментари, Реес успеа да ги собере сите познати научници во Лондон на меѓународна конференција на која се дискутирало за можноста за пронаоѓање на живот вон Земјата.

И покрај тоа што Реес веќе 50 години ги проучува звучните сигналите и безуспешно се труди да открие било каков звук и знак на живот, не планира да се откаже од својата намера.

- Технологијата е толку многу напредната што мислам дека ова е вистинска шанса и прав момент да откриеме вонземјани. Сега веќе многу полесно можеме да откриеме друга планета, па поради тоа треба сите сили да ги насочиме кон пронаоѓање на жив свет во вселената, изјави Реес.




Британскиот научник признава дека тоа би било голем чекор кон осигурувањето на иднината на човекот. Според него, големите телескопи кои се инсталираат на Земјата ќе помогнат кон пронаоѓање на планета слична на нашата.
_____________________________________________________________________________
ЕКСПЛОЗИЈА НА СУПЕРНОВА ЌЕ ЈА „ЗБРИШЕ“ ЗЕМЈАТА

Американските научници дојдоа до сознание дека планетата Земја би можела да биде „збришана“ при експлозија на ѕвезда оддалечена повеќе од 3.000 светлосни години.


Ѕвездата T Pyxidis наскоро би требало да експлодира, со сила од 20 милијарди милијарди милијарди мегатони ТНТ

Иако T Pyxidis е оддалечена околу 3.260 светлосни години, што од астрономска гледна точка е релативно мала дистанца, ударот на термонуклеарната експлозија би можел да ја збрише озонската обвивка на Земјата, предупредуваат научниците.

Астрономите од универзитетот Виланова во Филаделфија велат дека меѓународниот ултравиолетов истражувачки сателит покажал дека T Pyxidis , всушност се состои од две ѕвезди, од кои едната е бело џуџе кое смука гас и постојано расте. Кога ќе ја достигне критичната маса, ќе експлодира на парчиња. Ќе стане сјајна како сите други ѕвезди во галаксијата, велат научниците.


Фотографиите направени благодарение на Хабл телескопот покажуваат дека ѕвездата со помош на серијата мали експлозии се подготвува за „големата експлозија“.

Ваквите експлозии редововно се случувале на секои 20 години, почнувајќи од 1890 година, но запреле во 1967. Следната експлозија би требало да се случи за околу 20 години, велат научниците од Американското астрономско здружение во Вашингтон..

- Ѕвездата наскоро би можела да стане супернова, но тоа „наскоро“ може да биде многу далеку, па затоа не треба да се плашиме, вели Робин Скагел, претседател на британското Здружение за популарна астрономија.